Herrialde askok badute berea eta bazen garaia guk ere gurea izateko. Alemaniarrek mailua, errusiarrek orrikak, suediarrek eta ingelesek beraien giltza... brikolaia arlorik abertzaleenetakoa da. Zerbait asmatzen duenak, bere izena ezarri beharrean, bere herriarena jartzen dio. Laster, Arabako enpresa txiki bati esker, Euskal Herriaren izena zabalduko da ia mundu osoko burdindegi eta denda espezialduetan; hemen da eusko giltza.

Ez da erabateko asmakizuna ere, giltza ingelesaren eboluzioa baita eusko giltza. Nolanahi ere, zenbait lekutan egindako frogek izugarrizko iraultza aurreikusten dute. Arabar giltzak -Espainiako Estatuan izen hori izango du eusko giltzak- azkartu, erraztu eta bikoiztu egingo ditu giltza ingelesaren ezaugarriak. Urtean 60 milioi inguru giltza ingeles saltzen direla kontuan izanik, EGA Master enpresak asmakizun honekin asmatu duela dirudi.

Giltza ingelesa zer den ez dago azaldu beharrik. Bi hitzetan esateko, neurri askotako atal poligonalak biratzeko gailua da. Gure giltza ere halakoa izango da; badu, ordea, bestearekiko ezberdintasun garrantzitsu bat: biratu beharreko atalen neurrietara egokitzeko, giltza ingelesak gurpiltxo zurruna du; eusko giltzak, aldiz, desblokatu daitekeen gurpiltxoa darama, neurria askoz ere azkarrago zehazteko. Horretaz gain, eusko giltza kalibratua dago, neurri zehatzetara aldez aurretik ongi-ongi egokitzeko.

Iñaki Garmendiak hobekuntza honen garrantzia argitu nahi izan digu: "Mekanikan inoiz gertatzen da leku estuetara tresnak sartu beharra. Holakoetan ezinezkoa da batzuetan: giltza ingelesa sar daiteke baina eskua ezin da hurbildu, eta neurria hartzea ezinezkoa gertatzen da. Horregatik, aldez aurretik neurri zehatza finkatzea oso inportantea da".

Halakoa da eusko giltza -espainolez llave alavesa deituko zaio, frantsesez cle basque eta ingelesez basque wrench-. Bilbon egun hauetan egiten ari den Ferroforma azokan aurkeztu berri dute, eta berehala mundu zabaleko ia 100 herrialdetan izango dute salgai. "Tahiti, Seychelleak edota Mauricio bezalako toki exotikoetara oporretara doanak hango burdindegietan eusko giltza erosi ahal izango du".

Exportazioa izan da beti EGA Masterren erronka nagusia, "gure produkzioaren %90 baino gehiago atzerrian saltzen baitugu".