Dublinen, 1854.eko urriaren 15ean jaio zen. Ama literaturazalea zen eta aita okulista ospetsua. Oscar Wildek haurtzaro pribilegiatua izan zuen.
Burutsua, dotorea, umoretsua, axolagabea eta hiztun trebea zen. Ikasketetan arrakasta izan zuen beti; Oxfordeko unibertsitatean ikasi zuen eta sari asko irabazi zuen.
Ikasketak bukatu eta gero Londresera joan zen bizitzera.
1881ean lehenengo liburua argitaratu zuen: "Poemas". 1888tik 1894ra literatur lan handia egin zuen. Alde batetik "The woman´s world" emakumezkoentzako aldizkaria zuzentzen zuen eta bestetik olerki eta narrazio ugari idatzi zuen. Hauen artean "Dorian Grayren erretratua", 1891ean.
Liburu hau idazteko ideia Basil Ward pintorea bisitatzera joan zen egun batean bururatu zitzaion.
Pintorearen estudioan zegoenean mutil gazte bat ezagutu zuen. Gazte hau oso ederra zen eta modelo lana egiten zuen Basilentzat. Gaztearen erretratua bukatuta zegoenean Wildek Basili zera esan zion:
- Penagarria da gazte hau zahartzea.
Orduan pintoreak hau erantzun zion:
- Mutil hau gazte mantentzea eta beraren ordez erretratua zahartzea zoragarria izango litzateke.
Elkarrizketa honetatik atera zuen liburuaren argumentoa.
Hurrengo urteetan antzerki lan arrakastatsu batzuk sortu zituen. Besteak beste "Lady Windermereren abanikoa", "Garrantziarik gabeko emakumea" eta "Ernesto izena izatearen garrantzia".
Idazteaz gain, Wildek ez zion bere homosexualitateari uko egiten. Gizonekin dibertitzeko antolatzen zituen jaiak oso ezagunak omen ziren. Hala eta guztiz ere, ezkondu eta bi seme izan zituen.
Berrogei urte zituenean Alfred Douglasekin, Queensberry markesaren semearekin, maitemindu zen. Gazte honi gutun batzuk idatzi zizkion. Gutun hauetaz baliatu zen Queensberry markesa Wilde epailearen aurrera eramateko. Epaiketan "Dorian Grayren erretratua" liburua erabili zuten Wilde homosexuala zela frogatzeko.
Reading-eko kartzelan bi urteko zigorra betetzera kondenatu zuten.
1897an espetxetik atera zen. Handik aurrera Frantzian eta Italian bere lagunen eskuzabaltasunari esker bizi izan zen.
1900.ean hil zen Parisen.